الساعة صفر

.

"السّاعة صِفر"

يعني فاضل قد إيه؟!
رُبع نبض؟
ولاَّ سجدة فْ قلب فرض؟
ولاّ فات
وقتِ الصلاة؟
احتباس الروح مَلا
آخْر النفَس
والنهاية قرّبت..
من غُلبها
والحقيقة
لو قضِت طول حَظّها
تنده على..
نقطة رِضا..
مش جيِّ ردِّ يْبلِّ ريقها
مْنِ السؤال..
والصَّبر حال..
وازاي يكون..
من ضلِّ صوت!
وازاي نموت..
فوق عُمرنا
ساعتين كمان..؟!
وازاي نِلخبط حِسِّنا فوق "الهوا"
ينزل مطَر!
والجري من باب الصوَر
تحت الشتا
شيء مستحيل!
و الساعة (صِفر)
الساعة صفرِ...
وْمش هنلقى حدِّ واقف
ع السما
بيعبِّى فجر!!..
يْـقولّنَا..
هوّا فاضل قد إيه..؟!

.........................