كان بينا حب

" كان بينا حب "

فين زمان .. كان الكلام .. بيطلع لوحه تترسم
لبحر صافي .. او بستان .. او طفل فرحان يبتسم
او ليله دافيه والحبايب ملمومين
الشمس نايمه .. لكن نجومها مصحصحين
فرحة قلوبنا مخلياهم فرحانين
او نخله طرحت تمرها قبل الاوان
والكل قاعد جمبها سعيد فرحان
او شجره مدت غصنها بكل حنان
علشان تضلل تحتها على جوز حمام

دا كلمه واحده .. كانت تنسي اي هم
بهمسه واحده .. كل الصحاب يتلموا لم

كان الحبيب بكلمه حلوه يبقى ليك
بضحكه دافيه يبقى قلبه بين ايديك
بنظره منك تجرحه
بغمزه حلوه تفرحه
كان كل همه يبقى جمبك ملك ليك
كان الكلام بيطلع .. يروح للقلب
كان بينا حاجه وانتهت .. كان بينا حب

كان كل واحد مننا بيحب غيره
لو حس منه بالزعل مينمش ليله
الكل يحمد ربنا مهو كله خيره

كان اي حاجه ربنا فيها يبارك
كان اي حد في ايده خير .. بيه يشارك
كان الحزين مننا .. يداوى من غير طب
كان بينا حاجه وانتهت .. كان بينا حب

الليل يليل تلقى بابنا ميتقفلش
لا حد نخاف منه .. ولا ليه منأمنش

الحزن يدخل ميلاقيش معانا مطرح
الفرحه تيجي تلقى كل الناس بتفرح
دي دنيا تانيه كنت جوا جمالها تسرح
شجرة أمل ...وكل يوم بتطرح
فرح وهنا ... جوه القلوب يصب
كان بينا حاجه وانتهت ... كان بينا حب




**********************
بحلم ويحلالي وامتي هتتحقق امالي وتظهر اميرتي
اللي شاغله بالي ومغيره حالي وهي سبب حيرتي
**********************

A.Totti Is The King