الحلقة الرابعة ( بيوتنا فى الجنة )

الحلقة الرابعة

"بيوتنا فى الجنه"

احنا مكملين جولتنا فى الجنه وقولنا مكانا هيكون فين من ارض المحشر لو احنا بجد كنا احباء فى الله .. هنكون تحت ظل عرش الرحمن .. ينادى الله عز وجل يوم القيامه "اين المتحابون في؟"

فيظلهم بظل عرشه يوم لا ظل الا ظله ..

اشهد الله انى احبكم جميعا فى الله

وقولنا وقفتنا على باب الجنه فى انتظار ان يفتحه النبى عليه صلوات ربى وتسليمه ..واتكلمنا عن اعداد الله لنا فى الجنه .. وقولنا مشاكل الدنيا اللى مدايقانا " المرض والشيخوخه والفقر والموت"

كلها اتحلت من اول خطوة لينا من باب الجنه ..

والمرة اللى فاتت حكينا حديث موسى عليه السلام .. عن ادنى واعلى اهل الجنه منزله..

وقولنا ان فيه شروط معينه عشان تنال اعلى درجه فى الجنه..

فاكرينها ..

ان تكونوا .. لله وبالله ومع الله ..

يارب يكون شوقنا زاد شويه للجنه .. ويكون شوقنا ليها رفعنا شويه عن حب الدنيا اللى مكلبش فى قلوبنا ..

تعالو نكمل ..

انهارده هنتكلم عن بيوتنا فى الجنه ..

ايه احلى بيت حلمتوا انكوا تتجوزوا فيه ؟ .. ايه احلى فندق حلمتوا انكوا تقضوا فيه اسبوع عسل مش شهر.. ؟

ايه احلى فيلا او قصر عمركوا شوفتوها او تخيلتوها ..

هااااااااااااااااااااااا ..

طب مع تخيلكوا ده تعالوا نشوف بيوت الجنه .. عامله ازاى؟

سألت الصحابه النبى : حدثنا يارسول الله عن بناء الجنه

فقال النبى عليه الصلاة والسلام:" لبنه من ذهب ولبنة من فضه ملاطها المسك ..."

قبل مااكمل الحديث تعالو نتخيل دلوقتى شكل بيوت الجنه ..

اولا الحيطان .. يقول النبى انها طوبه ذهب وطوبه فضه والمونه اللى مابين الطوبتين مسك ..

الله اكبر ..

متخيلين .. تخيلو قالب ذهب وجنبه قالب فضه معمول منهم صور كبير .. وكمان المونه اللى مابينهم مسك .. ارقى انواع العطور..

انتو متخيلين الالوان .. متخيلين الرائحه .. دى حيطان البيت ..

طب تعالو نكمل

طب والارضيه ؟

تكملة الحديث"... حصباؤها اللؤلؤ .."

يعنى الارض مش بلاط ولا سيراميك .. الارض مفروشه لؤلؤ .. هاتو احسن البنايين يعرفو يبنو بيت من ذهب وفضه و مونه من المسك..

مش بقولكوا ..

تسوى اية الدنيا جنب الجمال ده ..

الجايه دى احلى ..

طيب دى الحيطان والارضيه ..

والسقف..؟

تكملة الحديث".... سقفها عرش الرحمن..."

والله جسمى كله بيتزلزل .. عارفين يعنى ايه تبقوا قاعدين فى بيت سقفه عرش الرحمن ..

تبصوا فوقكم تشوفوا نور عظيم .. هو نور الله عز وجل..

انا بجد هرضى فى الجنه بعشه .. مش بيت صغير .. بس بشرط ان يكون سقفه عرش الرحمن ..

يااااااااااااااااااااااااااااارب ..ياااااااااااااااااااااااااااااارب

مايحرمنا من رؤية هذا الجمال ..

هاااااااااااااااا

لسه مش عارفين تصلوا الفجر ... مش راكب معاكوا قراءة القرأن كل يوم...مش عارفين تسيبوا حب حرام..

بقولك سقف بيتك فى الجنه عرش الرحمن ..

احسبوها صح .. اتعبوا 50 ولا 60 سنه اللى هتعيشوها فى الدنيا ..

وارتاحوا فى الجنه اللى مالا نهاية

اوعوا تخسروا مالانهاية نعيم حقيقى وسعاده بجد .. قدام كام سنه

انا قصدت ان تكون حلقة انهارده خفيفه ..

عاوزة اسيبكم دلوقتى تتخيلوا فيلا او قصر حلمتوا بيه فى الدنيا ..

وتتخيلوا بيوت الجنه ..

وشوفوا ممكن تتنازلم عن الدنيا من اجل جنه الله ولا لا؟

الحلقة القادمه هنكمل جولتنا فى الجنه ..

فى رعاية الله وحفظه

السلام عليكم ورحمة الله وبركاته

زائر

جزاك الله خير حلقه جميله
مستنيه البعدها

وجزاكى مثله وأحسن يااااارب
شكرا ليكى ميرا على حسن المتابعة وعلى ردودك الجميلة
ربنا يعزك و يحبك يااارب وتفضلى منورة المواضيع على طوووول

زائر

ياارب ربنا يخليكى يا حبيبتى على كلامك الجميل
انتى المنوره مواضيعك
وهتلاقى مشاركتى عالطول انشاء الله

دة شرف ليا يا جميل
ربنا يكرمك على حسن الظن
جزاكى الله خيرا