خمس انواع من الرجال تكرههم البنات ..؟؟

خمسة أنواع من الرجال ترفض الفتيات الارتباط بهم


كل بنت بتحلم يكون شريك حياتها يكون شاب مثالي في نظرها ، بس طبعاً مافيش إنسان كامل في الدنيا دي والكمال لله وحده

أهم حاجة للبنت لما تيجي ترتبط بإنسان هيكون شريك حياتها ، لازم تكون عارفه إنه محترم ومتدين يعني عارف أصول دينه مش تزمّت يعني... لو هو كده ، مش هتلاقي فيه الصفات دي بالتأكيد تعالوا نشوف إيه هي الصفات دي



*البخيل



طبعاً مش محتاجة شرح ، بخيل يعني من الآخر هيخلي حياة الإنسانة اللي مرتبط بيها شُحّ وبخل على الآخر ودي طبعاً حاجة مرفوضه ، لدرجة إنه بيبخل على نفسه أول واحد ، وطبعاً طالما إنه بخيل على نفسه يبقى أكيد مش هيكون كريم مع غيره فمبالك بقى لما يبخل عليكي إنتي ...


*العصبي / النكدي



طبعاً عصبي ، يعني بيتعصب على أي حاجة وأقل حاجة ممكن تحصل ، بيتخانق مع دبان وشه وبيتلكك لأي حاجة ، وبالتالي ، هتحصل خناقات على مدار 24 ساعة ، والحياة حتبقى نكد في نكد .

مع العلم إن في بنات بيحبوا الراجل اللي يهزقهم ويتخانق معاهم وبيكون على قلبهم زي العسل وده نوع من أنواع عدم الكرامة إن الواحد يحب إن الشخص اللي قدامه يهينه بإستمرار .



*البصباص / رجل لافف وداير وعينه زايغة



راجل بصباص وبتاع بنات وعينه رايحة يمين وشمال في كل حته عشان يبص على بنات ، ده طبعاً مايتسحقش إنك ترتبطي بيه أصلاً ... ومع إنه بصباص ، يعني لافف وعينه زايغة ..
ويعني إيه لافف ؟؟ ، يعني ، عرف بنات بعدد شعر راسه وإيده ورجله كمان ، وبيعرف ياكل بعقلهم حلاوة بكلامه المعسول وبإحتراف شديد ، والمشكلة إن في فئة قليلة من البنات بيحبوا إنهم يتاكل بعقلهم حلاوة وهم راضيين - سبحان الله



*الكداب



الكدب بقى في دمه ، يفضل يكدب ويكدب ويكدب لحد ما يصدق نفسه وخدي عندك أفلام وتمثيليات هيحكيهالك عشان يخرج نفسه من مصيبة عملها وممكن تضايقك ،وللأسف ، بيخلي البنت بالمقابل تصدق كدبه لدرجة إن البنت بتوصل لدرجة إنها عارفة ومتأكده 100% أنه بيكدب عليها ومع ذلك تصدقه وكأن كلامه ده قرآن وفي الآخر تتلسع منه .



*الوصولي



ودي بقى بلوة لوحدها ، إنه ممكن يعمل أي حاجة عشان يستخوذ على إهتمامك ، وبتبقى كلها طرق مش سليمة عشان يوصل للي هو عايزه ، أو مثلاً عارف إنك أهلك أغنيا مثلاً ، فيرتبط بيكي لغرض ما في دماغة ، زي مابنشوف ساعات في المسلسلات ، عشان فلوس أهلها والمركز الإجتماعي و الوسايط والكلام ده كله يعني ..
فخدي بالك كويس ...