كانت نازلة على السلم والدنيا كحل ف وشها
وهو قابلها على السلم
وقالها : انا اسف
ردت وقالتله : على ايه هو انت دوست على رجلى من غير ما تقصد ؟
انا بتكلم على مين بقي ؟
دا سؤال مهم
انا بحكى على منى زكى وكريم عبد العزيز ف مشهد من فيلم اضحك الصورة تطلع حلوة
ايه بقي الموضوع ؟
اكيد اغلبكم شفتوا الفيلم ده
القصة انهم كانوا بيحبوا بعض جدا وبعدين فجاة سابها وخطب واحدة تانية
ولما عرفت الخبر كانت مخنوقة وهتموت لما شافها قالها : اسف
ردت وقالتله : على ايه انت دوست على رجلى من غير ما تقصد ؟
وصلنا لايه من ده كله ؟
دا سؤال اهم
لما بتدوس على رجل واحد ف الشارع من غير ما تقصد
بيكون كافى ان احنا تقوله
اسف
لكن لما تجرح حد بتحبه جرح كبير يا تري المفروض برضو
تقول نفس الكلمة السخيفة
اسف
وتقدرتقول بقى الاسف هيعمل ايه ؟
هيرجع الدنيا بمبى بعد ما بقيت كحلى ؟
ولا هينسينا الايام والذكريات وكل الحاجات ؟
كل واحد فينا كام مرة جرح او هان حد بيحبه وبعدين رجع بكل سخافة وقاله اسف ؟
كام مرة اتجرحت او جرحت حبيبك ؟
امك او ابوك او خطيبك او خطيبتك او جوزك او مراتك او ابنك او بنتك او صاحبك او حتى اي شخص بجد ميستاهلش ده منك ؟؟
ورجعت وقلت
اسف
بصوا بقي
قدامنا حلين
يا اما نفكر مليون مره قبل ما نجرح
او ندور على تكفير للى عملناه غير الكلمة دى
لان ما ينفعش نساوى الدوس على الرجل من غير قصد مع جرح القلب
مش كدا ولا ايه ؟
الأحد 14 سبتمبر - 4:57